à Dieu le restablir au throsne de feu Iohannes Basilius son pere, et ce pour estre par luy assisté à la conqueste de son Empire. Offernaci arriua à la Cour, et negotia, si bien que les Nopces furent solemnisées à Cracouie, où le Roy de Pologne assista personnellement, pendant ce temps, l’Empereur Demetrius fit leuer vne garde estrangere, à sçauoir vne Compagnie de cent Archers pour la garde de son corps, ausquels i’auois l’honneur de commander, et deux cens halbardiers, (ce qui ne s’estoit iamais veu auparauant en Russie) il donna liberté de se marier à tous ceux qui au temps de Boris, n’auoient osé se marier, comme à Mitisloftsqui, lequel espousa vne cousine germaine de la mere dudit Empereur Demetrius, qui assista deux iours de suite aux nopces. Vacilei, Choutsqui, estant r’appellé, et en aussi grande grace qu’auparauant, auoit desia fiancé vne de ladite maison, ses nopces se deuoient solemniser vn mois apres celles de l’Empereur ; enfin l’on ne voyoit autre chose que nopces et ioye au contentement d’vn chacun, car il leur fit gouster petit à petit que c’est qu’vn païs libre, gouuerné par vn prince clement, il alloit tous les iours vne fois ou deux voir l’Imperatrice sa mere, il se monstroit par fois vn peu trop familier enuers les Seigneurs, lesquels sont esleuez et nourris en telle subiection et crainte, qu’ils n’oseroient presque parler en presence de leur Prince sans commandement, combien que ledit Empereur sçauoit autrement tenir vne maiesté et grandeur digne d’vn Prince tel qu’il estoit, au reste, il estoit sage, auoit assez d’entendement pour seruir de Maistre
Page:Margeret - Estat de l'empire de Russie.pdf/106
Le texte de cette page a été corrigé et est conforme au fac-similé.
![](http://upload.wikimedia.org/wikipedia/commons/thumb/d/dd/Margeret_-_Estat_de_l%27empire_de_Russie.pdf/page106-1024px-Margeret_-_Estat_de_l%27empire_de_Russie.pdf.jpg)