digne que de se faire mocquer d’elles, iusques au decez dudit Boris Federuits, lequel mourut d’vne apoplexie vn Samedy vingt-troisiesme d’Auril, audit an.
Or auant que passer outre, il faut noter qu’il n’y a nuls duels entre-eux, car premierement ils ne portent nulles armes sinon à la guerre ou en quelque voyage, et si l’on est offencé de paroles ou autrement de quelques-vns, il ne s’en faut ressentir que par la voie de iustice, laquelle condamne celuy qui auroit touché l’honneur d’autruy à vne amende qu’ils appellent Beshest, qui veut dire reparation d’honneur, laquelle toutesfois depend de celuy qui est offencé, à sçauoir de le faire battre auec des batogues (qui s’execute en cette façon), l’on luy despoüille le dos iusques à la chemise, puis l’on le couche par terre sur son ventre, et il y a deux hommes qui le tiennent vn par la teste, et l’autre par les pieds, et auec des baguettes de la grosseur du doigt le frappe sur le dos en presence du Iuge et de celuy qui est offencé, et de tous ceux qui se trouuent iusques à ce que le Iuge dise hola, ou bien faut qu’il paye à l’interessé la somme des gages qu’il a annuellement de l’Empereur pour sa satisfaction, mais s’il est marié, il faut qu’il paye pour reparation de l’honneur de sa femme, deux fois autant, tellement que s’il a quinze roubles de gage annuel, il paye quinze roubles pour la reparation de son honneur, et trente roubles pour sa femme, qui monte à quarente-cinq roubles, et en vse de mesme quel que soit ses gages : mais l’iniure peut estre telle, que celuy qui a offencé
