Page:Marco Polo - Le Devisement du monde, 1556.djvu/54

grand jardin, plein d’arbres & de fleurs odoriferantes, fruictz savoureux, & autre herbes verdoientes & recreatives. Aussi feit bastir en ce jardin un brave & sumptueux Palays contenant plusieurs mansions, le tout enrichy de peinctures singulieres, & y feit mettre toutes choses qui pouvoient servir à la decoration d’iceluy. Brief sans en faire plus long recit, de toutes choses qui peuvent servir a donner plaisir & volupté à l’homme, rien n’y deffailloit : mesmes y avoit petits ruysseaux decoulants eaue, miel, vin & laict, diverses sortes d’instrumentz de musique, danses, bal, luictes, & autres jeux d’exercice, vestements precieux, & toutes choses pour donner delectation y estoient prestes & appareillées : desquelles les jeunes gens mettoit dedans ce jardin de plaisance pouvoient user à leur desir & affection, & lesquelz ne faisoient autre chose que mener ceste vie heureuse, sans prendre aucune tristesse ne melancholie. A l’entrée duquel jardin y avoit un fort chasteau bien equippé de gardes & munitions, par lequel seullement, & non ailleurs, on pouvoit entrer ou sortir du jardin. Or ce vieillard des montaignes (le propre nom duquel estoit Alardin) avoit des jeunes gens fortz & robustes, promptz & hardiz à tout service, lesquelz il entretenoit & destinoit seullement pour executer ses malheureuses & detestables entreprinses, les faisant premierement instituer en la loy de Mahumet, d’autant qu’elle promet de grandes voluptez charnelles en l’autre monde à ceulx qui l’observeront, & garderont en leur vie. Et affin de les ren-