& est fertile & abondant de plusieurs choses necessaires a la vie humaine, mesmement l’air y est salubre & temperé. Aussi y a de beaulx hommes, & encores de plusbelles femmes. Ilz vivent soubz l’observance de la loy & religion de Mahumet.
D’un grand tyran qui a regné au pays, & de ses adherens. Chap. XXVIII.
n ce pays y a une province appellée Mulete, en laquelle n’agueres regnoit un meschant & cruel Seigneur, qu’ilz appelloient le vieillard des montaignes, duquel on m’a dict & referé beaucoup de choses estranges, mesmement ce que j’en diray cy apres, je l’ay appris & entendu des habitans du pays qui me l’ont affermé & asseuré veritable. Assasmes, je croy que de la vient ce mot assasiner, qui signifie tuer & meurdrir. Et assasinateurs, qui sont volleurs et homicidiaires. Ce seigneur avec tout le peuple à luy subject, tenoit la perverse loy de Mahumet. Un jour il s’advisa d’une grande & indicible malice, Car il print a sa suyte grande compaignie de spadassins & gens abandonnez, qu’ilz appellent vulgairement Assasmes, par la grande audace & licence effrenée, desquelz, il faisoit meurdrir & tuer tous ceulx qu’il vouloit, en sorte qu’en peu de temps il fut crainct & redoubté de tous. Or pour y parvenir il feit la finesse & cautelle qui s’ensuyt. Il y a au pays une vallée fort plaisante & delectable, environnée de toutes partz de haultes montaignes. En icelle il feit planter & dresser un beau &
