Ces colosses d’orgueil furent tous mis en poudre,
Et tous couverts des monts qu’ils avoient arrachez ;
Phlegre, qui les receut, pût encore la foudre
Dont ils furent touchez.
L’exemple de leur race, à jamais abolie,
Devoit sous ta mercy tes rebelles ployer ;
Mais seroit-ce raison qu’une mesme folie
N’eust pas mesme loyer ?
Déja l’étonnement leur fait la couleur blesme,
Et ce lasche voisin qu’ils sont allé querir,
Miserable qu’il est, se condamne luy-mesme
A fuïr ou mourir.
Sa faute le remord : Megere le regarde,
Et luy porte l’esprit à ce vray sentiment,
Que d’une injuste offense il aura, quoy qu’il tarde,
Le juste chastiment.
Bien semble estre la mer une barre assez forte
Pour nous oster l’espoir qu’il puisse estre battu ;
Mais est-il rien de clos dont ne t’ouvre la porte
Ton heur et ta vertu ?
Neptune, importuné de ses voiles infames,
Comme tu paroistras au passage des flots,
Voudra que ses Tritons mettent la main aux rames,
Et soient tes matelots.
Page:Malherbe - Œuvres poétiques de Malherbe, éd. Blanchemain, 1897.djvu/89
Le texte de cette page a été corrigé et est conforme au fac-similé.
68
ODE IX.
