Le texte de cette page a été corrigé et est conforme au fac-similé.
Mais vous meſmes leſueillerez
vous parlez plus hault quatre fois
par le ſang bieu que ie ne fais
ie vous requier quon me delure
guillemette
Et queſſe cy eſtes vous yure
ou hors du ſens dieu noſtre pere
le drappier
yure maugre en ait ſaint per
vecy une belle demande
guillemette
helas plus bas
le drappier
Je vous demande
pour ſix aulners bon gre ſaint george
de drap dame
guillemette
On vous le forge
et a qui lavez vous baille
le drappier
A luy meſme
Guillemette
Il eſt bien taille
dauoir drap helas ie ne hobe
il na nul meſtier dauoir robe
iamais robe ne veſtira
