Page:Madeleine de Scudéry - Clélie, histoire romaine - Volume 03.pdf/232

ſuffit qu’un cœur ſoit embraſé, ſans vouloir encore le percer de trait. Enfin elle purifie de telle ſorte cette paſſion, qu’elle ne luy laiſſe rien de dangereux, quoy qu’elle ne luy oſte rien d’agreable. Mais pour en reuenir à Brutus, apres que Damo luy eut montré la Lettre qu’elle eſcriuoit à Bellenire, il fit ſemblant de n’entendre pas qu’il eſtoit cét agreable Amy dont elle parloit à ſon Amie : & il le fit afin de ſe faire dire plus clairement vne choſe qui luy plaiſoit, mais enfin elle le mit dans la neceſſité de luy rendre mille graces. Il luy dit pourtant qu’il n’oſeroit iamais voir Bellanire apres ce qu’elle luy eſcriuoit de luy : mais elle luy reſpondit qu’il la verroit deuant qu’il fuſt peu, parce qu’elle eſtoit reſoluë de faire vn voyage à Crotone ; qu’elle auoit engagé Tarquinie à le faire ; & qu’elle l’obligeroit de l’y mener : & effe-