dont la conuerſation eſt tout à fait agreable, qui n’a ny caprice ny orgueil, qui aime ſes Amies cherement, qui ne fait autre choſe que me parler de vous, quoy qu’elle ne vous connoiſſe que de reputation & qui me donne mille tendres teſmoignages de ſon amitié. De grace aprenez moy ſi ie puis ſans ingratitude refuſer ſon affection, ou ſi ie puis ſans vous eſtre infidelle, luy donner vne partie de la mienne ; car puis que ie vous ay donné mon cœur, ie n’oſe y receuoir cette charmante & nouuelle Amie, ſi vous ne me le permettez, quoy que ie ne ſçache pas trop bien comment ie pourray faire pour luy en deffendre l’entrée.
Apres que Brutus (qui portoit vn nom ſuppoſé à Metapont dont ie ne me puis ſouuenir) eut leu cette Lettre, il dit à Damo qu’il la trouuoit fort galante, mais qu’il ne comprenoit pas comment il luy eſtoit neceſſaire pour y reſpondre. Vous le
