Page:Madeleine de Scudéry - Clélie, histoire romaine - Volume 03.pdf/216

beaucoup de moderation dans l’eſprit, luy dit auec vn ſoûris malicieux, qu’il eſtoit preſt d’auoüer qu’il eſtoit vn Galant ſans amour; pourueu que de ſon coſté il auoüaſt auſſi qu’il eſtoit vn Amant ſans galanterie. Le redoutable Milon, à la force de qui rien ne pouuoit reſiſter, ſe fiant à cét auantage que la Nature luy auoit donné, reſpondit aigrement à Brutus; qui ſe fiant auſſi autant à la force de ſon courage, que Milon ſe fioit à la force de ſon corps, repliqua à ce fameux Athlete auec vne ſi noble audace, que l’autre s’en ſentant outragé rougit de colere, & prenant la parole ; s’il pouuoit eſtre glorieux à Milon de te vaincre, luy dit-il, ie t’aprendrois bien toſt qu’il y a des temeritez malheureuſes, en te puniſſant de celle que tu as, d’irriter vn homme qui t’eſcraſera dés qu’il en aura la volonté. Ie ſçay bien, reprit bruſque-