Page:Madeleine de Scudéry - Clélie, histoire romaine - Volume 03.pdf/215

tapont, parce qu’il vouloit mourir à Rome. Il m’a pourtant auoüé qu’il auoit eu vne fois ou deux le cœur aſſez touché, & que l’ambition & l’amitié auoient eſtouffé ces amours naiſſantes. C’eſt pourquoy bien que toutes les conuerſations de Brutus ne fuſſent en ce temps-là que de choſes galantes & amoureuſes, les Dames l’auoient pourtant nommé entre elles le galant ſans amour. Il eſt vray que ce nom là l’expoſa à vne dangereuſe auanture : car vous ſçaurez que ce fameux Milon dont la force l’a rendu ſi celebre aux ieux Olimpiques, & dont l’eſprit n’eſtoit pas auſſi grand que le corps, alla ſe meſler vn iour de railler auecque luy, & de le vouloir nommer comme les autres vn Galant ſans amour. Mais il le fit d’un ton ſi fier, que Brutus qui a ſans doute beaucoup d’impetuoſité dans le cœur, quoy qu’il ait quand il le veut,