Page:Madeleine de Scudéry - Clélie, histoire romaine - Volume 02.pdf/97

& à parler vn peu apres d’autre choſe : demandant à cette Princeſſe, comment Sextilie auoit reçeu la nouuelle de la mort de Bianor. Elle l’a reçeuë, reprit-elle, auec beaucoup de douleur : on ne croit pourtant pas que ce ſoit tant par tendreſſe, que par vn ſentiment d’ambition : car en fin elle eſt ſi perſuadée que Mezence fera mourir Porſenna, & elle l’eſtoit ſi fort qu’il feroit eſpouſer Galerite à ſon Frere, qu’elle eſt inconſolable de ſa mort : car comme Mezence eſt vieux, elle craint que ſa fortune ne change eſtrangement s’il meurt ſans auoir fait mourir le Roy de Cluſium, & ſans auoir marié la Princeſſe ſa Fille à quelqu’vn qui deſpende d’elle. Du moins y a-t’il vne Perſonne qui ſe vante de bien ſçauoir ſes ſentimens, qui a aſſuré à Aurelie que ce ſont là les ſiens. Apres cela, ils parlerent de beaucoup d’autres choſes : de ſorte que