Page:Madeleine de Scudéry - Clélie, histoire romaine - Volume 02.pdf/94

Tiberinus, & tous ceux qui s’eſtoient trouuez à cette Bataille, publioient que luy ſeul l’auoit gagnée : Celere s’y ſignala auſſi hautement, & ſe rendit digne par pluſieurs grandes actions, de l’eſtime qu’Aronce auoit pour luy. Cependant comme le General des Ennemis eſtoit mort, & qu’il ne demeura aucunes Troupes ennemies ſur pied, Mezence apres auoir laiſſé les ſiennes ſous la conduite d’vn vieux Capitaine, & donné ordre aux Funerailles de Bianor, creût qu’il deuoit retourner à Perouſe, pour raſſurer ſes Peuples, par la certitude de ſa victoire. De ſorte que comme Aronce ne vouloit pas l’abandonner, de peur qu’il n’entrepriſt quelque choſe contre la vie de Porſenna, il s’y en retourna auſſi. Mais il s’y en retourna ſi chargé d’honneur, que comme le bruit des grandes choſes qu’il auoit faites l’auoit deuan-