animoſité, qui a accouſtumé d’eſtre aux autres, lors que la veuë du ſang & des Morts de tous les deux Partis, a mis la fureur dans le cœur de tous les Soldats. D’abord l’Aiſle droite de Mezence fut rompuë, & Bianor qui la commandoit y fut tué : mais Aronce dont le Corps auoit eſté ioint en cette occaſion à celuy que commandoit Bianor, ayant pris ſa place, fit changer de Party à la Fortune : & ralliant les Troupes rompuës, il rompit celles qui les venoient de rompre. D’autre part Mezence s’eſtant eſtonné de voir que Bianor auoit ſi peu reſiſté, auoit retenu l’ardeur des ſiens en ſe retenant luy meſme : ſi bien que les Ennemis profitant d’vn temps ſi fauorable, auoient percé le Corps de la Bataille où il eſtoit : de ſorte que ſes affaires eſtoient en mauuais termes, lors qu’Aronce remarquant ce qui ſe paſſoit,
Page:Madeleine de Scudéry - Clélie, histoire romaine - Volume 02.pdf/91
Le texte de cette page a été corrigé et est conforme au fac-similé.
