Page:Madeleine de Scudéry - Clélie, histoire romaine - Volume 02.pdf/90

tout remeuë, tout combat : & ceux qui les commandent pouuant aiſément en diſpoſer ſelon leur volonté ; on peut dire qu’ils ſont les Artiſans de leur propre gloire : puis que le hazard ne leur fait iamais guere remporter de ces ſortes de victoires qui n’apartiennent point aux victorieux : & qui ſont vn pur effet du caprice de la Fortune, pluſtoſt que de la veritable valeur, & de la prudente conduite. Mais ſi iamais il s’eſt fait de Grandes actions en peu de temps, & entre peu de Troupes, ce fut à la fameuſe Iournée où Mezence ſe vit en eſtat de perir, ſi la valeur & le bonheur d’Aronce, ne l’en euſſent empeſché. En effet, ces deux petites Armées ne furent pas pluſtoſt en preſence, que ſans s’amuſer long temps à chercher leurs auantages, le Combat commença ; & commença auec la meſme ardeur, & la meſme