Page:Madeleine de Scudéry - Clélie, histoire romaine - Volume 02.pdf/88

de tous les autres, qui fut deſtiné à batre l’eſtrade, à tous les perils, & à toutes les fatigues de l’Armée. Il eſt vray que Celere fut le fidelle Compagnon de ſes Auantures de Guerre, comme il l’auoit eſté de ſes Auantures d’amour. Cependant Aronce s’aquita ſi dignement de ce penible employ, qu’on peut dire qu’il ſauua Mezence plus d’vne fois : car par ſa diligence il ſçeut touſiours le veritable eſtat des Ennemis : & empeſcha touſiours qu’ils ne ſçeuſſent celuy où eſtoit ce Prince : car dés qu’il paroiſſoit quelque Corps détaché, il l’attaquoit, & le pouſſoit : & il fit tant de glorieuſes actions en cette rencontre, que le nombre en paroiſſoit incroyable ſi on les diſoit en détail. Mais enfin apres pluſieurs iours, où de part & d’autres on ne cherchoit pas à en venir à vn Combat deciſif, ils ſe trouuerent eſgalle-