Page:Madeleine de Scudéry - Clélie, histoire romaine - Volume 02.pdf/86

eſté tout à fait paiſible poſſeſſeur de l’Eſtat du Roy de Cluſium, il donna ordre qu’elles formaſſent vn Corps. Le Peuple de Perouſe s’offrit de luy meſme à ſortir : & Aronce ſuplia Mezence de luy permettre d’aller reconnoiſtre les Ennemis. Et en effet il fut à la Teſte de deux cens Cheuaux ſeulement, pour taſcher de ſçauoir au vray quelle eſtoit leur force : mais il s’aquita ſi bien de cet employ, qu’il deffit vn Party qu’il rencontra, & qu’il fit pluſieurs Priſonniers, par où il ſçeut le veritable eſtat des choſes. Si bien que retournant aupres de Mezence, apres auoir executé glorieuſement ce qu’il auoit entrepris, il l’exhorta à aller au deuant de ſes Ennemis. Et en effet dés que ce qu’il auoit de Troupes furent iointes, & qu’on eut eſtably quelque diſcipline parmy tous ces nouueaux ſoldats qui s’enroloient pour deffendre leurs