fort importante. De ſorte que ne pouuant s’empeſcher d’en faire voir quelque chagrin dans ſes yeux ; Mezence qui s’en aperçeut s’en irrita : & pour punir Tiberinus de l’audace qu’il auoit de trouuer mauuais qu’il entretinſt Aronce, il luy dit peu de choſe, & continua de parler à ce Prince. Si bien que Tiberinus en ayant vn deſpit extréme, ſortit aſſez bruſquement, & fut chez la Princeſſe des Leontins. Cependant Mezence ne continua plus de parler de Porſenna à Aronce : mais il le preſſa de luy vouloir dire preciſément qui il eſtoit, & d’où il eſtoit. Vous ſçaurez, luy dit-il, que ie vous l’ay demandé plus d’vne fois, & que vous ne m’auez iamais reſpondu preciſément. Il eſt vray Seigneur, repliqua Aronce, que i’en ay vſé comme vous dittes : & ie vous ſuplieray meſme que i’en vſe en-
Page:Madeleine de Scudéry - Clélie, histoire romaine - Volume 02.pdf/76
Le texte de cette page a été corrigé et est conforme au fac-similé.
