Page:Madeleine de Scudéry - Clélie, histoire romaine - Volume 02.pdf/677

agitation n’auoit rien de deſagreable, elle ne s’en inquieta pas au commencement. Mais pour Artaxandre, il eſtoit ſi aiſe d’eſtre amoureux, comme ie l’ay deſia dit, que ne pouuant cacher la ioye qu’il en auoit, il la montra toute entiere à Cyneſie le quatre ou le cinquieſme iour de leur connoiſſance. Car comme il ſe trouua ſeul aupres d’elle, il ſe mit à luy faire des remercimens : & il les luy fit auec tant d’exageration, qu’elle creût effectiuement qu’elle auoit ou dit ou fait quelque choſe qui l’auoit obligé, dont elle ne ſe ſouuenoit plus. Auſſi cherchoit-elle dans ſa mémoire auec aſſez d’attention, pour taſcher de trouuer ce qui faiſoit qu’il la remercioit auec tant d’empreſſement. Mais apres y auoir bien penſé, elle ne trouua autre choſe, ſinon qu’ayant dit beaucoup de bien de luy à tous ceux à qui elle en auoit parlé, il pouuoit