Page:Madeleine de Scudéry - Clélie, histoire romaine - Volume 02.pdf/676

tres malheureux, car il n’eſtoit pas aimé où il euſt voulu l’eſtre : & il l’eſtoit d’vne Perſonne pour qui il n’auoit pas le cœur touché : ainſi il auoit preſques toutes les faueurs que l’amour peut faire obtenir ſans eſtre heureux ; & il auoit auſſi toutes les douleurs que cette paſſion peut faire ſentir : car il aimoit ſans eſtre aimé ; il eſtoit ialoux ſans ſçauoir bien preciſément la cauſe de ſa ialouſie ; la nouuelle connoiſſance d’Artaxandre luy déplaiſoit ; il eſtoit faſché que le Portrait de Paſithée euſt eſté en ſes mains ; il ne ſçauoit s’il deuoit ceſſer de feindre de l’aimer, ou s’il deuoit faire ſemblant de n’aimer plus Cyneſie, pour voir ſi elle ne le rapelleroit point : & il eſtoit enfin ſi embarraſſé, qu’on ne pouuoit pas l’eſtre dauantage. Pour Cyneſie, elle auoit auſſi quelque ſecrette agitation de cœur : touteſfois comme cette