Page:Madeleine de Scudéry - Clélie, histoire romaine - Volume 02.pdf/668

Artaxandre par autruy, reprit Cyneſie ie pourrois peut-eſtre n’entendre pas tout à fait raillerie : mais comme ie ſçay quelle eſt ſon humeur, ie veux l’entendre admirablement auiourd’huy : & pour vous le teſmoigner, adiouſta-t’elle, ie veux me confier à vous, & vous auoüer que ce Portrait de Paſithée eſt à Clidamis. Quoy, reprit Artaxandre, Clidamis eſt mon ſucceſſeur ? car graces aux Dieux il ne ſera iamais mon Riual, s’il ne deuient amoureux de vous. Vous me parlez ſi peu ſerieuſement, reprit Cyneſie en ſouriant, que ie ne ſçay ſi ie fais bien de vous faire vne confidence de cette nature : cependant comme diuerſes raiſons font que ie ſeray bien aiſe que Clidamis ait le Portrait qui luy apartient, & qu’il ne ſçache pas par quelle bizarre Auanture vous l’auez eu ; ie vous prie s’il vous en parle, de luy dire que vous l’auez trouué