Page:Madeleine de Scudéry - Clélie, histoire romaine - Volume 02.pdf/666

auec leur Mere, & dittes moy ſeulement ce que ie veux ſçauoir : & en effet Artaxandre ſe mit à luy faire vn fidelle recit de ſon Auanture : mais il le luy fit auec tant de bonheur pour luy, & ſi flateuſement pour Cyneſie, qu’elle y prit quelque plaiſir. Elle l’interrompit pourtant, lors qu’il voulut luy repreſenter combien il l’auoit trouuée belle : c’eſt aſſez Artaxandre, luy dit-elle alors, c’eſt aſſez : car ie ne voulois ſçauoir autre choſe que ce qui vous pouuoit iuſtifier : & pour vous teſmoigner que ie ne ſuis pas iniuſte, ie veux bien vous traiter en innocent, & vous coniurer de me mettre en eſtat de vous auoir vne obligation. Quoy qu’il me fuſt plus agreable de vous en auoir qu’il ne me le fera que vous m’en ayez, reprit-il, ie vous aſſure touteſfois qu’il n’eſt rien que ie ne ſois capable de faire pour voſtre ſeruice. Si cela eſt, adiouſta-t’elle,