Page:Madeleine de Scudéry - Clélie, histoire romaine - Volume 02.pdf/661

que les autres Dames qui eſtoient là l’eſcoutoient auſſi, Cleophile parloit à Philionte, pour taſcher de ſçauoir comment l’Auanture de la derniere nuit eſtoit arriuée, & Artaxandre parloit à Cyneſie : qui n’ayant rien plus fortement dans la penſée, que de rendre à Artaxandre la magnifique Boiſte qu’il luy auoit laiſſée, & de pouuoir retirer celle qu’il auoit pour la rendre à Clidamis, eſtoit fort aiſe qu’il luy parlaſt en particulier : eſperant qu’elle trouueroit occaſion de faire ce qu’elle vouloit. Il ne luy fut pourtant pas auſſi aiſé qu’elle ſe l’eſtoit figuré : car Artaxandre tourna la conuerſation d’vne maniere, qui ne luy permit pas de faire tout ce qu’elle ſouhaitoit. En effet ſuiuant ſon enioüement ordinaire, il ſe mit à luy faire autant de reproches de ce qu’elle auoit eſté trop long temps aux Champs, que s’il euſt eſté le meil-