Page:Madeleine de Scudéry - Clélie, histoire romaine - Volume 02.pdf/659

ſi elle fut ſurpriſe de la voir, Clidamis le fut bien encore dauantage : car il ne pouuoit comprendre par quelle Auanture cette Boiſte qu’il auoit enuoyée à Cyneſie, pouuoit eſtre entre les mains d’Artaxandre qu’elle n’auoit iamais veû qu’alors : & qu’on luy preſentoit comme vn homme qui effectiuement luy eſtoit inconnu. Cependant Cyneſie ne pouuant plus douter que ce ne fuſt Artaxandre qui fuſt venu dans la Chambre où elle auoit couché, en rougit par vn ſentiment de modeſtie : & pour cacher ſa rougeur, elle ſe mit à parler bas à Cleophile : qui eſtant fort aiſe d’auoir ſi bien deuiné, luy demanda en riant, apres qu’elle eut ceſſé de parler, ce qu’il luy ſembloit de ſon nouuel Amant ? Ie ſuis ſi embarraſſée de l’embarras de Clidamis, reprit-elle, que ie n’ay pas loiſir de reſpondre à la folie que vous me di-