Page:Madeleine de Scudéry - Clélie, histoire romaine - Volume 02.pdf/655

ſoit cela en ſouriant, Cyneſie en ſourit auſſi : mais elle ne laiſſa pas (à ce qu’elle a elle meſme aduoüé depuis) de s’habiller auec vn peu plus de deſſein d’eſtre bien, que quand elle n’auoit qu’vn deſſein general de plaire à tout le monde. Mais enfin comme elle n’eſtoit pas chez elle, dés que ſa Mere & elles furent habillées, elles remercierent ceux qui les auoient ſecouruës, & s’en retournerent dans leur Maiſon. Cependant Cyneſie ne montra point la Boiſte qu’Artaxandre luy auoit laiſſée au lieu de la ſienne, de peur qu’on ne changeaſt cette Auanture en la publiant : & qu’on n’en diſt quelque choſe à ſon deſauantage. Ce qui embarraſſoit fort Cyneſie, eſtoit qu’elle ne ſçauoit que dire à Clidamis, qu’elle iugeoit bien qui la viendroit voir, car elle ne pouuoit luy rendre le Portrait de Paſithée : & elle ne vouloit pas qu’il