Page:Madeleine de Scudéry - Clélie, histoire romaine - Volume 02.pdf/653

qu’il ignore que vous n’eſtes pas trop bien auec Paſithée : ioint que cela pourroit encore eſtre plus plaiſant : car ſi Paſithée eſt peinte auec vne Guirlande de Fleurs ſur la teſte, il y a apparence que c’eſt vn Portrait qu’elle luy a donné, & qu’il luy a rendu : du moins ſçay-ie bien que le Peintre qui la peignit lors qu’elle donna ſa peinture à Artaxandre, me dit qu’il l’auoit peinte ainſi. Aſſurément, reprit Cyneſie, c’eſt ce Portrait là : de ſorte que ſi c’eſt Artaxandre qui me l’a pris, il aura eſté bien eſtonné de reuoir entre ſes mains vn Portrait qui a deſia eſté à luy. Quoy qu’il en ſoit, dit Cleophile, ie ſuis aſſurée que vous ne ſerez point trop marrie de voir Artaxandre dans vos Fers. Si cela faiſoit dépit à Paſithée, repliqua-t’elle, i’aduouë que ie n’en ſerois pas trop fâchée : en verité, reprit Cleophile,