Page:Madeleine de Scudéry - Clélie, histoire romaine - Volume 02.pdf/652

& il trouua ſon cœur ſi bien diſpoſé pour luy, que ſoit pour ſe vanger d’Artaxandre, en luy faiſant voir qu’elle l’oublioit encore plus promptemenet tout viuant qu’il eſt, qu’elle n’auoit oublié Philicrate mort, ou pour quelque autre cauſe, elle l’a fort bien reçeu : & elle luy a donné ſon Portrait, qu’il m’enuoya hier, en me ſommant de ma parole : & en m’aſſurant qu’il eſtoit aimé de Paſithée, & qu’il m’aimoit touſiours. De ſorte que comme le hazard ſe meſle de tout, il a fait qu’ayant attaché ce Portrait à mon bras, afin de le rendre à Clidamis quand ie le verrois : il ſe trouue qu’on me l’a pris de la maniere que ie vous l’ay dit. En verité, reprit Cleophile, cette Auanture eſt tout à fait agreable : car ſi c’eſt Artaxandre qui a ce Portrait, comme ie n’en doute point, il eſt bien embarraſſé à deuiner par où vous l’auez eu : n’eſtant pas poſſible