Page:Madeleine de Scudéry - Clélie, histoire romaine - Volume 02.pdf/644

Mais apres les auoir dits, elle regarda Cleophile, qui n’eſtoit pas moins ſurpriſe qu’elle : touteſfois apres y auoir vn peu penſé, Cleophile conclut qu’il falloit que ce fuſt Artaxandre qui euſt fait vn ſemblable tour. Ce n’eſt pas, dit-elle, que ie puiſſe reconnoiſtre ſon ſtile par ces quatre Vers, car il en fait de plus iuſtes & de plus raiſonnables que ceux-là : mais comme ils ont ſans doute eſté faits tout à fait à l’improuiſte, il ne faut pas conclure qu’ils ne ſoient point d’Artaxandre : ioint que ie luy en ay quelqueſfois veû faire ſur le champ qui n’eſtoient guere mieux tournez. De ſorte que ie conclus que c’eſt Artaxandre qui les a faits ; que c’eſt Artaxandre qui vous a veuë endormie ; & que c’eſt Artaxandre qui eſt amoureux de vous. Mais Artaxandre, reprit Cyneſie, eſt à la Campagne : Artaxandre, reprit Cleophile, eſt donc