plus ſurprenante galanterie dont vous ayez iamais entendu parler. Apres cela Cyneſie raconta à Cleophile ce qui luy donnoit tant de curioſité : & afin de luy faire mieux voir cette Boiſte, elle tendit le bras à ſon Amie, la priant de détacher le Cordon qui la tenoit. Cependant à peine Cleophile eut elle détaché cette Boiſte, que Cyneſie l’ouurit : mais elle fut bien ſurpriſe d’y trouuer les quatre Vers qu’Artaxandre y auoit eſcrits : & elle le fut ſi fort, qu’elle ne pût s’empeſcher de les relire tout haut, apres les auoir leûs tout bas : & en effet ſans rien dire autre choſe à Cleophile, elle ſe mit à les reciter de cette ſorte.
Plus heureux la nuit que le iour,
Ie veux auoir cét auantage,
Que vous connoiſſiez mon amour,
Sans auoir connu mon viſage.
