Page:Madeleine de Scudéry - Clélie, histoire romaine - Volume 02.pdf/641

d’inquietude. Ce qui l’embarraſſoit, eſtoit qu’elle ſçauoit qu’il n’y auoit point alors d’hommes dans cette Maiſon, que le Pere de Philionte : qui eſtant fort vieux, n’eſtoit pas propre à eſtre ſoubçonné d’vne pareille choſe. Elle ſçauoit bien qu’il auoit vn Fils, car elle connoiſſoit Philionte : & elle n’ignoroit pas qu’Artaxandre logeoit auſſi dans cette Maiſon : car encore qu’elle ne le connuſt point, elle en auoit entendu parler : mais elle ne ſongeoit pas à eux, parce qu’elle auoit entendu dire qu’ils eſtoient aux Champs, & qu’ils n’auoient pas mandé quand ils reuiendroient. Comme elle eſtoit dans cét embaras, vne Amie particuliere qu’elle auoit, qui ſe nomme Cleophile, vint la voir auec empreſſement, pour ſe reſiouïr auec elle de ce que le feu qui auoit eſté à la Maiſon de ſa Mere, n’y auoit pas fait plus