Page:Madeleine de Scudéry - Clélie, histoire romaine - Volume 02.pdf/637

elle a donné ce Portrait à quelque nouueau Galant, qui l’a ſacrifié à Cyneſie. Mais ſi cela eſt, dit Artaxandre, il faut conclure que Cyneſie a vn Amant qu’elle ne haït pas : car quand on prrend de ces ſortes de ſeuretez, on s’engage autant qu’on penſe engager les autres. Ce que ie vous dis, reprit Philionte, n’eſt peut-eſtre qu’vne imagination, que ie veux meſme croire eſtre mal fondée : car puis que vous voulez deuenir amoureux à quelque prix que ce ſoit, il ſe faut bien garder de vous dire rien qui vous en puiſſe empeſcher. Il eſt vray, reprit Artaxandre, qu’vne paſſion eſt vn grand ſecours contre l’ennuy, en vn lieu où l’on n’a rien à faire : car enfin le ſimple deſſein de faire faire vn meſſage, ou d’en receuoir vn, vous occupe agreablement tout vn iour. Vous n’auez pas pluſtoſt fait vne choſe, que vous penſez à en