Page:Madeleine de Scudéry - Clélie, histoire romaine - Volume 02.pdf/636

ſe, attachée en lieu où elle la puiſſe voir. En diſant cela, Artaxandre tira cette Boiſte de ſa Poche, qu’il n’auoit point encore ouuerte, tant il auoit eu l’eſprit occupé de l’Auanture qui luy eſtoit arriuée. Mais il fut fort eſtonné lors qu’il vint à l’ouurir, d’y trouuer le meſme Portrait de Paſithée, qu’il luy auoit rendu quand ils s’eſtoient broüllez. Il creût pourtant d’abord que c’eſtoit que ces deux Filles eſoient Amies, ſans qu’il l’euſt ſçeu ; & que Paſithée auoit enuoyé ſon Portrait à Cyneſie pendant qu’elle eſtoit à la Campagne. Il eſt vray qu’il ne fut pas longtemps en cette opinion : car Philionte luy dit au contraire qu’elles eſtoient ennemies : de ſorte que ne ſçachant que penſer de cette Auanture, il en fut aſſez embarraſſé. Pour moy, luy dit Philionte, ie croirois volontiers que comme Paſithée a vne humeur qui ne la fait pas trop ſeuere,