Page:Madeleine de Scudéry - Clélie, histoire romaine - Volume 02.pdf/631

auoit renduë vne des plus laides Femmes de la Terre. Neantmoins comme il l’auoit reconnuë, parce que la Lune eſclairoit ſa Chambre comme s’il euſt eſté iour, il en eſtoit reſſorty tout doucement, ſans vouloir troubler ſon repos : & eſtoit allé voir ſi celle de ſon Amy eſtoit auſſi occupée. Si bien que l’ayant rencontré au haut de l’Eſcalier, & s’eſtans raconté l’vn à l’autre leurs Auantures differentes ; Artaxandre à qui ſa Belle endormie eſueilloit l’eſprit, pria ſon Amy de vouloir reſſortir aueque luy ; d’ordonner à celuy qui leur auoit ouuert la Porte de ne dire point qu’ils fuſſent reuenus ; & de s’en aller coucher tous deux chez vn de leurs Amis. Et en effet Philionte trouuant quelque choſe de plaiſant à faire que Cyneſie ne ſçeuſt pas d’abord comment on luy auroit donné vne Boiſte pour la ſienne conſentit à ce que ſon Amy luy propoſa.