Page:Madeleine de Scudéry - Clélie, histoire romaine - Volume 02.pdf/625

qui ſembloit s’eſtre miſe exprés en vne ſcituation auantageuſe, pour paroiſtre plus belle, & pour donner de l’amour à Artaxandre : car comme il faiſoit chaud, vn grand Pauillon de couleur de Pourpre, qui couuroit ſon Lit, eſtoit retrouſſé, & laiſſoit à Artaxandre la liberté de pouuoir admirer ſa beauté, qui luy parut d’autant plus merueilleuſe, qu’il fut agreablement ſurpris par vn ſi bel obiet. En effet Cyneſie qui eſt grande & de belle taille, eſtoit couchée à demy ſur le coſté droit : de ſorte que comme la Couuerture qui la couuroit eſtoit aſſez ſimple, on voyoit toute la forme de ſon corps, comme on voit celle de ces Figures que les grands Peintres font : qui ne laiſſent pas à trauers tous les plis de ces admirables draperies qu’ils repreſentent ſi bien, de faire voir la iuſte proportion de toutes les parties du corps