Page:Madeleine de Scudéry - Clélie, histoire romaine - Volume 02.pdf/619

pourtant pas ainſi : car le ſilence, le repos, & la laſſitude d’où elle eſtoit, d’auoir veillé d’vne maniere ſi incommode, firent qu’elle s’endormit tres profondément, auſſi bien que tous ceux qui eſtoient dans cette Maiſon. Cependant il faut que vous ſçachiez, que comme il faiſoit alors fort chaud, & que les nuits eſtoient beaucoup plus propres à voyager que le iour, Philionte & Artaxandre, afin d’eſuiter l’incommodité de l’exceſſiue chaleur, s’eſtoient mis tous deux ſeuls dans vne petite Barque, comme le Soleil ſe couchoit, pour s’en retourner à Crete : laiſſant ordre à leurs Gens de s’y en aller par terre le lendemain : car comme la Lune eſclairoit alors toute la nuit, il eſpererent beaucoup de plaiſir de s’en retourner de cette façon. Et en effet toute la commodité qu’on peut trouuer en vn petit voyage ſe trouua en celuy-