Page:Madeleine de Scudéry - Clélie, histoire romaine - Volume 02.pdf/615

Maiſtre de chez luy, quoy qu’il euſt ſon Pere, & ſa Mere ; de ſorte qu’ayant vne fort belle Maiſon aux champs il y mena Artaxandre pour vn Mois, qui ſe conſola auec luy meſme, & auec les Muſes, de la perte de Paſithée : car il fit les plus agreables choſes du monde pendant ſon ſéiour de la Campagne. Ainſi ce commencement d’amour n’eut point de fin ny par mort, ny par Mariage, ny par haine, ny par ialouſie. Mais pour paſſer de celuy-là à vn autre, il faut que vous ſçachiez vn accident qui arriua, le ſoir meſme qu’Artaxandre & Philionte reuinrent à Crete. Il faut meſme que ie vous aprenne que depuis leur départ, il eſtoit arriué à cette Ville, vne Dame qu’Artaxandre n’auoit iamais veuë : & qui a vne Fille d’vne beauté ſi admirable, que ſi ie n’auois pas veû ce que ie voy, ie dirois que c’eſt la plus belle