Page:Madeleine de Scudéry - Clélie, histoire romaine - Volume 02.pdf/614

vous aime plus. Comme ie ne ſçaurois faire ce que vous voulez, reprit-elle, faites ſi vous pouuez ce que vous dittes que vous voulez faire. Vous m’en deffiez Madame, luy dit-il, parce que vous ne croyez pas que ie le puiſſe : mais ie vous montreray peut-eſtre, qu’on peut rompre les Fers que vous donnez : car à n’en mentir pas, i’en ay autant rompu que i’en ay porté : & pour commencer de vous prouuer que ie ſuis Maiſtre de moy quand ie le veux, ie m’en vay me priuer d’vn fort grand plaiſir en me priuant de voſtre veuë. Et en effet Artaxandre ſe leua, & ſortit de chez Paſithée : & pour luy teſmoigner qu’effectiuement il auoit deſſein de rompre auec elle, il luy renuoya vn Portrait qu’elle luy auoit donné : & il fut le lendemain aux Champs auec Philionte, chez qui il eſtoit logé : car comme ſon Amy eſtoit Fils vnique, & fort honneſte homme, il eſtoit preſques