Page:Madeleine de Scudéry - Clélie, histoire romaine - Volume 02.pdf/612

accouſtumé de dire : il ne rioit pas meſme de ce qu’elle diſoit : il ne luy donnoit nul plaiſir : & il ſe plaignoit continuellement quand il luy parloit : de ſorte que Paſithée vint à trouuer qu’il luy euſt eſté bien plus commode qu’il euſt eſté mort, que d’eſtre aupres d’elle comme il y eſtoit. Auſſi luy en dit-elle vn iour ce qu’elle penſoit : car comme il ſe mit à luy reprocher ſon peu d’affection ; de grace Artaxandre, luy dit Paſithée, reprenez voſtre belle humeur, ou ie feray pis pour vous que pour Philicrate : puis que ie n’ay fait que l’oublier, & que ie vous haïray horriblement. Ha Madame, luy dit-il, ie vous en défie : car ie ſuis perſuadé que vous ne ſçauez ny aimer, ny haïr : ainſi comme ie ne puis eſperer d’eſtre fortement aimé, ie ne puis craindre d’eſtre fort haï. Mais enfin Madame, luy dit-il, ſi vous voulez que cét Ar-