Page:Madeleine de Scudéry - Clélie, histoire romaine - Volume 02.pdf/61

qui vous a pû faire reſoudre à ne vous ſeruir plus de l’adreſſe que Statilie vous auoit fait aquerir. Puis que vous le voulez ſçauoir Madame, reprit Aurelie, il faut que vous ſçachiez qu’apres auoir apris fort ſoigneuſement de Statilie toutes les inuentions qu’elle ſçauoit pour ouurir des Lettres, & auoir eſté cinq ou ſix iours enſemble à ne faire autre choſe : apres, dis-ie, m’y eſtre renduë fort adroite, ie me ſeruis de mon adreſſe en diuerſes occaſions. Mais comme i’auois vne autre Amie que Statilie que i’aimois beaucoup, & qui m’aimoit tendrement, ie luy fis confidence d’vne Lettre que i’auois ouuerte, & ie voulus luy aprendre ce que ie ſçauois. Mais comme c’eſt vne Perſonne vn peu plus ſcrupuleuſe en pareille matieres que Statilie, elle prit la reſolution de me faire vne malice