Page:Madeleine de Scudéry - Clélie, histoire romaine - Volume 02.pdf/609

ſon enioüement, ſe mit ſi auant dans la teſte de s’imaginer qu’il auoit ſuiet de s’eſtimer malheureux de ce que Paſithée auoit eu ſi peu de ſentiment de la mort de ſon Riual, qu’il n’euſt pas eſté guere plus faſché ſi elle en euſt aimé quelque autre, qu’il l’eſtoit de ce qu’elle n’auoit pas aſſez aimé celuy-là : car enfin (diſoit-il à Philionte, en luy exagerant ce qu’il ſouffroit) quelle ſeureté puis-ie iamais auoir de l’affection de Paſithée ? puis que ie ſçay de ſa bouche qu’elle ne peut m’aimer dauantage qu’elle a aimé Philicrate qu’elle n’a point aimé, puis qu’elle s’en eſt ſi toſt conſolée. Mais vous en aimez quelqueſfois tant d’autres, reprit Philionte, qui ne vous aiment pas plus qu’elle, ſans que vous vous en tourmentiez. Il eſt vray, diſoit-il, mais c’eſt que ie ne les aime pas plus qu’elles m’aiment : cependant il n’en eſt pas ainſi de Pa-