Page:Madeleine de Scudéry - Clélie, histoire romaine - Volume 02.pdf/606

rois point poſſible, ſi l’experience ne nous faiſoit voir tous les iours qu’il y en a qui ſe marient ſeulement pour ſe marier, ſans que l’ambition ny l’amour les y porte : & ſans pouuoir dire vne bonne raiſon de leur Mariage. Auſſi ne me fiay-ie iamais à ces grandes Pleureuſes, qui veulent s’enfermer dans les Tombeaux de leurs Maris : car i’en ay tant veû qui ſe ſont conſolées trop toſt, que i’aime beaucoup mieux vne douleur plus ſage & plus longue : & i’aime mieux auſſi, comme ie l’ay deſia dit, qu’vne Femme ait deux Amans que deux Maris. Pour cela, dit Artaxandre, ie croy que Paſithée ne vous contredira point : ie l’auouë, reprit-elle, & pour reconnoiſtre dignement ce que Cephiſe a dit ſur cét Article, ie la diſpenſe de ſe donner la peine de dire ſi l’on peut auoir de nouuelles Amies, & de nouueaux Amis, quand