vertueuſe, quoy que ſes actions ne ſoient pas criminelles. De ſorte, reprit Paſithée, qu’il eſt donc permis d’auoir vn ſecond Amant, apres auoir perdu le premier ? Il ſeroit plus beau, repliqua Cephiſe, de n’en auoir point, ou de n’en auoir eu qu’vn : mais enfin pour accommoder mes Loix à la foibleſſe humaine, ie ſouffre que l’on en puiſſe auoir deux : mais c’eſt à condition qu’il y ait vn fort grand interuale entre la mort du premier Amant, & la naiſſance de la ſeconde amour. Ie veux meſme que le dernier Amant ſoit digne de ſucceder au premier : ie veux encore qu’on deffende ſon cœur plus opiniatrément cette ſeconde fois que la premiere : qu’on ait quelque ſecrette confuſion de ce nouuel engagement : & qu’on ne s’engage enfin qu’apres que le temps & la raiſon ont effectiuement dû vous conſoler. Car ie ne
Page:Madeleine de Scudéry - Clélie, histoire romaine - Volume 02.pdf/602
Cette page n’a pas encore été corrigée