Page:Madeleine de Scudéry - Clélie, histoire romaine - Volume 02.pdf/599

ſe remarier : & ſi lors qu’on perd vn Amy, ou vne Amie, on peut donner leur place à vne nouuelle Amie, ou à vn nouuel amy. Vous demandez bien des choſes à la fois, repliqua Cephiſe ; & ce qu’il y a d’admirable, adiouſta Artaxandre, c’eſt que quand vous auriez fait les plus equitables Loix du monde, elle les enfraindroit toutes, en penſant meſme faire vne fort belle choſe, que de ne s’aſſuietir à rien. Comme ie ne puis rien refuſer à Paſithée, reprit Cephiſe, ie veux bien la contenter : quoy que ie ſois perſuadée auſſi bien que vous, qu’elle demande à ſçauoir ce qu’elle ne veut pas aprendre : ou du moins ce qu’elle ne veut pas mettre en pratique. Quand i’enfraindray toutes ces Loix, repliqua-t’elle, ie ne feray rien de fort extraordinaire, puis qu’on enfraint bien celles des plus Grands Rois du Monde : parlez