Page:Madeleine de Scudéry - Clélie, histoire romaine - Volume 02.pdf/590

de pleinte nouueau, capricieux, & plaiſant, repliqua-t’elle, ie ne m’eſtonne pas que vous veüilliez vous en diuertir : & ie veux bien entendre raillerie, & vous reſpondre ſi vous le voulez, comme ſi ie croyois que vous parlaſſiez ſelon voſtre veritable ſentiment. Serieuſement Madame, reprit Artaxandre, ie ſuis tout à fait affligé de voir que vous ſçachiez ſi mal aimer : & que vous ayez ſi peu aimé, le plus aimable de tous les hommes. Ie vous aſſure, repliqua-t’elle, que ie l’ay aimé autant que ie puis aimer : & que ie ne vous aime pas dauantage. Ie le crois Madame, reſpondit-il, & ie le crois aiſément : car mon Riual eſtoit incomparablement mieux fait que moy ; il vous auoit rendu mille ſeruices ; il auoit fait mille choſes pour vous que ie n’ay pas faites : & ie ne doute nullement que vous ne l’ayez plus aimé que