Page:Madeleine de Scudéry - Clélie, histoire romaine - Volume 02.pdf/584

qui elles luy eſtoient arriuées n’euſt pas eſté mort, & mort depuis aſſez peu de temps. Mais ce qu’il y auoit de plaiſant à ce recit, c’eſtoit qu’elle aduoüoit ingenûment qu’elle auoit eu vne affection tres forte pour Philicrate ; qu’il ne luy auoit iamais donné nul ſuiet de pleinte ; qu’ils s’eſtoient ſeparez comme deux Perſonnes qui s’aimoient cherement ; & qu’elle luy auoit meſme eu de l’obligation apres ſa mort : parce qu’ayant fait ſon Teſtament en partant, il luy auoit laiſſé tout ce qu’il luy pouuoit laiſſer de ſon Bien. De ſorte, luy dit alors Artaxandre, que la mémoire de Philicrate vous eſt fort chere ? Ie vous aſſure, reprit-elle, que ie m’en ſouuiens quelqueſfois auec beaucoup de plaiſir, car il eſt vray que nous auons bien ry enſemble : & alors ſe reſſouuenant encore de certaines choſes qu’elle n’auoit pas dittes, elle ſe