Page:Madeleine de Scudéry - Clélie, histoire romaine - Volume 02.pdf/581

uoir bien preciſément comment il eſtoit poſſible que Paſithée euſt eſté ſi toſt conſolée de la mort d’vn Amant d’vn ſi grand merite. De ſorte que l’eſtant allé voir ſuiuant ſa couſtume, & l’ayant trouuée ſeule, il fit ſi bien que ne faiſant d’abord aucun ſemblant de ſçauoir rien de l’amour que Philicrate auoit euë pour elle, il fit venir à propos de le nommer comme vn homme qui auoit eſté de ſes Amis. Mais à peine l’eut-il nommé, que Paſithée prenant la parole ; quoy (luy dit-elle, ſans aucune eſmotion extraordinaire) vous auez connu Philicrate ? ouy, repliqua-t’il, & il mourut entre mes bras, dont i’eus beucoup de douleur, car c’eſtoit vn fort honneſte homme. En mon particulier, repliqua Paſithée, il m’auoit fort diuertie durant long temps : mais pour vous, adiouſta-t’elle en ſouriant, ie ne ſçay ſi vous auez