Page:Madeleine de Scudéry - Clélie, histoire romaine - Volume 02.pdf/580

me Philicrate qui a aimé Paſithée, & qui en a eſté aimé ? Ouy Artaxandre, reprit Philionte, c’eſt ce meſme Philicrate qui a eſté ſi toſt oublié apres ſa mort, quoy qu’il euſt eſté ſi cherement aimé durant ſa vie. Ha Philionte, reprit Artaxandre, il n’eſt pas poſſible qu’vn homme du merite de celuy-là pûſt eſtre ſi toſt oublié, ſi Paſithée & luy n’auoient eu quelque démeſlé enſemble en ſe ſeparant. Vous eſtes ſi bien auec Paſithée, repliqua Philionte, que vous luy ferez aiſément dire tout ce qui s’eſt paſſé entre eux : c’eſt pourquoy ie ne veux pas vous en dire dauantage. Et en effet, quoy qu’Artaxandre pûſt faire, il ne pût obliger Philionte à luy aprendre ce qu’il vouloit ſçauoir. De ſorte que ſa curioſité s’augmentant par la difficulté qu’il trouuoit à la ſatiſfaire, il ſe mit cette bizarre fantaiſie dans la teſte, de vouloir ſça-