Page:Madeleine de Scudéry - Clélie, histoire romaine - Volume 02.pdf/579

Paſithée : ils auoient commencé de s’aimer en ſe ioüant enſemble dans leur Enfance : cét aimable Amant auoit donné mille heroïques marques d’amour à cette Perſonne : il auoit hazardé tout ſon Bien à ſa conſideration : il auoit expoſé ſa vie pour elle : & il n’eſt point de teſmoignages d’amour qu’il ne luy euſt rendus. Auſſi pour reconnoiſtre ſon affection, Paſithée auoit-elle fait pour luy tout ce qu’vne Perſonne de ſa vertu pouuoit faire, ſans exception aucune : & ie ſuis aſſuré que Philicrate tant qu’il a veſcu, n’a eu aucun ſuiet de ſe pleindre de Paſithée : car comme il ne l’auoit iamais perduë de veuë, & qu’en la voyant, il l’auoit toûiours diuertie, il ne connoiſſoit pas bien ſon cœur. Quoy, reprit alors Artaxandre, Philicrate que i’ay veû il y a enuiron quatre Mois, & qui mourut au lieu où i’eſtois, eſt ce meſ-