Page:Madeleine de Scudéry - Clélie, histoire romaine - Volume 02.pdf/572

dit-elle en riant, & ſi vous me plaiſez touſiours autant qu’auiourd’huy, nous ſerons touſiours bien enſemble. Ha aimable Paſithée, reprit-il, que vous me donnez de ioye de parler comme vous faites ! mais afin que vous me connoiſſiez mieux, ſçachez que ie ne ſuis pas comme ces Gens qui ne ſont pas Maiſtres de leur eſprit, qui ſont tantoſt guais & tantoſt triſtes, & qui ne peuuent reſpondre de leur humeur : car pour moy, comme i’ay de quatre ou cinq ſortes d’eſprits, ie montre preciſément celuy que ie veux montrer : c’eſt pourquoy puis que celuy que i’ay auiourd’huy vous plaiſt, vous me le verrez toute voſtre vie : & en effet apres cela Artaxandre & Paſithée furent en la plus grande familiarité du monde. Paſithée luy dit où elle demeuroit ; Artaxandre luy demanda la permiſſion de l’aller voir ; elle la luy accorda ; & lors qu’il fa-