Page:Madeleine de Scudéry - Clélie, histoire romaine - Volume 02.pdf/57

qualitez que de bonnes) qu’elle luy marquoit la plus grande partie de ce que ie luy auois dit d’elle : ie trouuay dans vne autre vne raillerie aſſez fâcheuſe qu’elle faiſoit de moy : & ie deſcrouuris enfin que c’eſtoit la plus artificieuſe Fille de la Terre, & la moins digne de mon amitié. De ſorte que dans les premiers mouuemens de ma colere, ie luy renuoyay toutes ſes Lettres ouuertes : & ie fis vn vœu ſolemnel, que i’ay fort religieuſement obſerué, qu’il ne paſſeroit iamais de Lettres en mes mains que ie ne les viſſe, pour ne me voir plus expoſée à la cruelle auanture que i’auois eſuitée par bonheur : & en effet depuis cela, ie me ſuis ſi bien trouuée de ma curioſité, que ie ne m’en ſçaurois repentir. Ie voy bien ſans doute, reprit la Princeſſe des Leontins, que vous auez trouué l’inuention de n’eſtre plus trompée : mais ne trouuez