Page:Madeleine de Scudéry - Clélie, histoire romaine - Volume 02.pdf/565

les yeux creux, à cauſe qu’elle les a touſiours vn peu batus. De ſorte que ſçachant que cette place ne luy eſtoit pas fauorable, elle ſe trouua bien embarraſſée entre l’intereſt de ſon ambition, & celuy de ſa beauté : car en s’y mettant, elle ſçauoit bien qu’elle paroiſtroit moins belle à ceux qui viendroient : & en ne s’y mettant pas, elle craignoit que quelque autre Dame ne s’y miſt, & ne fuſt au deſſus d’elle. Si bien que ne pouuant reſoudre cela en tumulte ; parce que c’eſtoit vne choſe qu’elle n’auoit pas preueuë, à cauſe que c’eſtoit vn Apartement neuf, où elle n’auoit iamais entré, elle ſe trouua en vne grande inquietude. Maiſ ſi elle n’y auoit point entré, reprit vne Dame de la Compagnie, comment ſçauoit elle que cette place eſtoit ſi mauuaiſe ? La demande eſt ingenieuſe, reprit Artaxandre, mais la reſponce eſt facile à